Kaledin, Aleksei

Errusiar militarra, Don ibaiaren arroko eskualdeko kosakoa. Gaztetatik Errusiar Armadan karrera militarra egin zuen, zalditerian batik bat. I Mundu Gudan postu garrantzitsuak izan zituen, bai Zalditeria Inperialean zein Armada arruntean. Berea izan zen guda horretan errusiar tropek lortu zuten garaipen eskasenetako bat, 1916ko maiatzean austriar tropak 70 milia atzera egitera behartu zituenean. Otsaileko iraultza ez zuen onartu eta Behin-behineko Gobernuaren aurka konspiratzen zuen tsarismoa berriz boterean ezartzeko asmoz. Maiatzean Aleksei Brusilov jeneralak bere kargutik kendu zuen, “Armadaren demokratizatzearen kontrakoa” zelako. 1917ko ekainean, Dongo kosakoen ataman (buru) izendatua izan zen eta Donen “Gobernu Militar Kosakoa” aldarrikatu zuen. Abuztuan, Moskuko Estatu-Konferentzian, iraultza zanpatzeko programa bat aurkeztu zuen, eta aldi berean hitzaldi horretan Errusia “errepublika” gisa aldarrikatzea eskatu zuen. Kontrairaultzaile amorratu gisa, Korniloven Estatu-kolpearen laguntzaile izan zen, halere, Estatu-kolpe horrek porrot itxura zuenean, “Dongo Gobernu kosakoak” alde batera egitea lortu zuen. Kolpeak porrot egin ostean Gobernuan bere postutik kentzeko eta atxilotzeko asmoa erakutsi zuen, baina “Dongo Gobernu kosakoak” atxilotzeari uko egin eta berriz postu horretara itzultzea eskatu zuen. 1917ko Urriko Iraultzaren aurreko egunetan, Kerenskik Kaledin bisitatu zuen, kosakoek boltxebikeen aurka egin zezaten, trukean Kaledin errugabetzeko eta Armadaren buru ezartzeko hitza emanez. 1917ko Urrian, Iraultza Sozialista Proletarioarekin batera, Kaledinek Dongo lurraldean Gobernu kontrairaultzaile bat ezarri zuen, eta Behin-Behineko Gobernuko kideak Novotxerkassk hirira gonbidatu zituen, botere-gune antiboltxebike bat sortzeko asmoz. Bere kosakoak Armada Zuriaren nukleo bat sortzeko erabili zituen (jarraitu zioten kosakoak, kosakorik pobreenak boltxebikeen alde, edo behintzat borrokatik at egon nahian zeuden eta). Kaledin, Mikhail Alekseiev eta Lavr Kornilovekin batera, praktikoki Armada Zuriaren lehen nukleoaren sortzailea izan zen. 1918ko urtarrilean, frontean izandako porroten ondorioz, zuriek Rostov hiria galtzear zeudenean, bere buruaz beste egin zuen. Bere buruaz beste egiteko oharrean, “kosakoek beren atamana gudan jarraitu ez zutela” eman zuen arrazoitzat.